يمكن العنوان غريب شوية لكن هو ده احساسي بالضبط وحسيت إني فكرت فيه بالتعبير العامي لمعرفتي مدى حب اليسار وأهل اليسار للتقعر والفذلكة والكلام الكبير
أنا توجهي السياسي ليبرالي اجتماعي والطبيعي إني أفرح لما ألاقي اليسار ملوش أى تواجد على الساحة – بصفته منافس – ولا دور ولا تأثير على مسار الأحداث .. لكن ده مش منطقي يحصل لما يكون البديل عن اليسار هو التيارات المنغلقة فكريا وانسانيا ومالهاش قضايا غير التكفير والطهارة وكراهية الآخر
اليسار المصري انهاردة حد يعرف وصل لفين أو بيعمل ايه؟ هل شغال في الجامعات وفي المناطق العشوائية والمصانع والقرى المطحونة ؟ هل ظهرت أو حتظهر أحزاب يسارية بتضم القيادات العمالية وقيادات اللجان الشعبية ؟
أنا بسأل الأسئلة دي مش استهزاء أو شماتة في اليسار لكن حزنا أن تيار مهم في أى مجتمع يندثر في المجتمع المصري وينقسم تواجده إما بين حزب لسة رئيسه بعد الثورة هو رفعت السعيد وبين مجموعة من المراهقين سياسيا وفكريا مش بيقدموا أى جديد على مستوى الشارع ولا التواجد الشعبي ويقتصر نشاطهم على بعض التويتات الزاعقة على تويتر
للأسف اليساريين انهاردة لسة محبوسين في مشهد موت المناضل في فيلم “احنا بتوع الأتوبيس” وهو بيقول أكلاشيه من الأكلاشيهات المحفوظة القديمة .. للأسف اليساريين النهاردة لسة مش قادرين يفكروا برة زنزانة المعارضة والنضال والكلام الكبير ومش عاوزين يتخيلوا أنهم مفروض بعد شهور أو سنوات يكون ليهم نصيب في الحكم وحيتحملوا جزء من مسئولية الدولة زى أى حزب عمالي محترم في العالم
لسة اليساريين المصريين بيتكلموا في نظريات عفى عليها الزمن من عشرات السنين ولأنهم معزولين في كتبهم وتنظيراتهم وتنظيماتهم مش مضطرين أنهم يطوروا أفكارهم عشان تتناسب مع سنة 2011 ومش قادرين يقدموا حلول منطقية قابلة للتطبيق ويقبلها الشعب المصري
هل فعلا نخبة اليسار المصري مش قادرة تشوف الفرصة التاريخية اللي صعب تتكرر تاني في تاريخ مصر ومش عاوزين ينزلوا يبني قواعد شعبية حقيقية وسط القرى والمصانع والمدن والمؤسسات الحكومية ؟
هل اليساريين فعلا مقتنعين بالمعارك “النضالية” اللي بيخوضوها مرة في الطريق لرفح ومرة تانية عند السفارة الاسرائيلية ومش شايفين أن واجبهم التاريخي أنهم يخوضوا معارك فكرية وشعبوية في امبابة وشبرا واسكندرية وسينا والمحلة ودمنهور وأسوان ؟
طيب يا جماعة أنتو لو عاوزين تطردوا السفير الاسرائيلي وتفتحوا الحدود فعلا ما تركزوا السنتين تلاتة الجايين أنكم يبقى ليكم قواعد جماهيرية تنتخبكم وتديكم شرعية الحكم على برنامج أول نقطة فيه طرد السفير وبدل ما “تطالبوا” الحكومة أنها تطرد السفير وتفتح الحدود ساعتها أنتم تشكلوا الحكومة اللي تطرد السفير وتفتح الحدود وهي مسنودة على ارادة شعبية حقيقية ومثبتة في صندوق الانتخابات
يا أهل اليسار المصري “المأفْوَر” هل أنتم فعلا مش قادرين تنضجوا عن مرحلة المراهقة الثورية بتاعة الرفيق جيفارا ؟ ولا أنتم مستسهلين نظرية المؤامرة ولعب دور الضحية اللي بيتم قمعها طول الوقت ولو محدش قمعها تروح تدور على حد يقمعها ؟
التاريخ مش حينسى أن الفرصة كانت قصادكم ذهبية عشان يكون ليكم دور كبير في قيادة مصر للعدالة الاجتماعية والمساواة – اللي مصر فعلا محتاجاهم ومتعطشة ليهم – وإن أنتم فضلتم اطلاق الشعارات ومحاربة طواحين الهواء بلا نتيجة ولا برنامج ولا مجهود حقيقي
أفيقوا يرحمكم الله
5 تعليقات على اليسار المصري… فاكس السنين
طبعًا، أغلب اليساريين، وليس الشعبويين، مسحولين مع السفارة الإسرائيلية والنكبة وغزة وتحرير فلسطين إلى آخر هذه الأحلام كما تعرف، ولكن أبدًا لن يبلغ يساري الحكم في مصر، لأن أساسًا مفيش على الساحة السياسية ممثل حقيقي لليسار، وأعتقد أن البرادعي قد يصنّف نفسه مثل يا بدوي، ليبرالي اجتماعي.
السبب يا بدوي ليس تقصير منهم وحسب كما أشرت، ولكن تقصير في موائمة النظريات الحالمة مع الواقع أساسًا… فهي نظريات أكل عليها الزمن وشرب، ولا تصلح إلا للكتب والمتاحف حاليًا.
أمّا أحلام قيادة اليسار للدفّة، وتكوين حزب قوي ينافس في الانتخابات، فهي، وبغض النظر عن صعوبة تحقيقها، إلا وأنها إن تحققت، لن يسنّ لهم غلق السفارة وطرد السفير، لأن معاهدة السلام ليست معاهدة شعبية كي يتم بناء قاعدة شعبية لفكّها.
معاهدة السلام هي معاهدة دبلوماسية، سوف تأتي لمصر بالخراب إذا فكر أي سياسي أو حكومي في نقضها، وأولهم هجوم حلف الأطلسي… طرد السفير وقطع العلاقات مجرد خيالات لا يستوي سياسيًا تطبيقها على أرض الواقع، فضلًا عن أن قطع العلاقات ليست الحل الجذري لأزمة فلسطين. فالحل هو الحوار الودي وإشراك كافة التيارات والجنسيات بما فيهم إسرائيل على مائدة الحوار، والكفّ عن نغمة عدم الاعتراف المزمن الذين يعيشون فيه، فعدم اعتراف أشخاص بعينها بإسرائيل لن يغيّر من واقع جغرافيا العالم شيء…
مقالة لطيفة في وقت قاعدين نتفرج فيه على شباب السفارة… مسليين جدًا حقيقي!
واضح أنك ما تعرف حاجة عن اليسار و حركته في الشارع
على العموم اليسار المصري حاليا حركته بقت أكثر مرونة من الأول و احلام الرأسماليين الطبقية العنصرية … مستحيلة
و بدل حضرتك ما عمال تنتقد اليسار شوف عملت أيه فينا أفكاركم الراسمالية و ودت البلد لفين و بعد كده راجع نفسك
نيجي بقى اليسار بيعمل أيه و واضح أن حضرتك قاعد ورا الكيبورد توزع الاتهامات على الناس من غير ما تعرف حاجة … مناضل كيبوردي رأسمالي أصيل ههههه
حاليا من خلال مركز الدراسات الاشتراكية اللي بيقود عملية تكوين النقابات العمالية و تأسيس حزب العمال المصري بتؤكد أن حركة اليسار موجودة و بقوة ، تقدر تزور موقعه من هنا http://www.e-socialists.net
مركز افاق للدراسات الاشتراكية و هو كان الواجهة القانونية للحزب الشيوعي المصري اللي حاليا تحت التأسيس و من المنتظر أطلاقه خلال شهور تقدر برده تزور موقعه من هنا http://www.afaqeg.com ، و ده موقع الحزب الشيوعي المصري http://www.cp-egypt.com
ده غير الحزب الاشتراكي المصري اللي تم تاسيسه و أوراقه حاليا قدام محكمة النقض لأعلانه ، و فيه مفاوضات لضم حزب العمال مع الحزب الاشتراكي بما أن التوجهات قريبة من بعض
أما على مستوى الشارع لو حضرتك متابع هتعرف حاجة مهمة أن أغلب القيادات الشبابية اللي قادت الثورة كانوا من التيارات اليسارية ، أغلب قيادات أئتلاف الثورة من التيار اليساري بكافة أطيافه .. يعني اليسار موجود و متواجد بقوة
احمد زيدان لسه بيرمي كلامه الغريب “شعبوية” أكليشيهات محفوظة بتتردد من غير فهم للأسف !!!!
هو اللي يعارضك يبقى غريب ومش فاهم يا أستاذ عمرو؟
زهقنا من الاتهمات البلد بتتحرق و أحنا واقفين نتهم بعض أنت شعبوي و أنت مش عارف أيه و ابصر و ايه
انا بقالي شهرين في الشارع الناس مش لاقية تاكل … أمبارح وصلي ملخص لمحضر جلسة الحوار الوطني اللي بيعملها المجلس العسكري المعلومات اللي اتقالت عن الحالة الاقتصادية زي الزفت التضخم وصل 14% و هيوصل 20% خلال 3 شهور ، حجم الديون الخارجية مفزع ، و حجم الديون الداخلية مصيبة تانية و ما فيش حد من شوية كريمة المجتمع الوسخة قال حل كل واحد عمال يغني على ليلاه و يدافع عن مصالحه و البلد بتغرق بجد و الله