فى الدستور الحالى حوالى 30 مادة تعطى الفرعون القادم سلطات الفرعنه علينا وهذه لا وقت لدينا لتعديلها فإحنا شعب مش فاضى وعايز يشتغل وينتج وكلنا شوق لرؤية الفرعون الجديد فبالتالى سنعدل الست مواد اللى قالنا عليها الفرعون القديم عشان هو فاهم أكتر مننا فى مصلحة الفرعون اللى بعده

نبدأ بـ 77 وتنقسم إلى جزئين مدة الرئاسة كام سنه؟ وتجدد لكم مره؟ طبعاً لو كانت 4 سنين يبقى إحنا هنرتقى ونتقدم أما لو 5 سنين يبقى هنتقدم ببطء لكن لو 6 سنين يبقى هننام فى الخط ولو 7 عشان الإستقرار والذى منه يبقى هنرجع لورا .. توقعاتى ستبقى كما هى 6 سنين وبالنسبه للمدد فإما ستكون مدتين أو تلاته يعنى من 12-18 سنه فرعنه وبالمناسبة الرئيس جمال عبد الناصر عدلها قبل كده لتكون فترتين وجاء الرئيس السادات من بعده ومعجبتهوش فراح مرجعها مدى الحياه يعنى مش تعديل تاريخى ولا يحزنون

الماده 76 ومن دلوقتى سميها مادة “اخترنا لك “ فأياً كانت الصياغة الجديده ستعتمد على المبدأ السلطوى اللى بيقول ” إختاروا من بين ما إخترنا لكم “ يعنى بما إنك يا مواطن عايز إختيارات فمش هنسيبك تختار لوحدك .. إحنا يا مواطن هنديك إختيارات كلها تبعنا وإحنا موافقين عليها كلها وإنت عليك تختار واحد منهم وده بيسموه تجميل للإستبداد وإنتخابات صوريه بلا فائده وتوجد أكثر من طريقه فى هذا الإتجاه واحده منها أن توجد هيئة مثل مجلس صيانة الدستور فى إيران .. كل اللى نفسه يبقى رئيس يترشح ثم يختار مجلس صيانة الدستور أبناء النظام الشرفاء الموالين للنظام عشان الشعب ينتخب منهم فرعون جديد فى تمثيليه ليس لها صله بالديمقراطيه ومن الجائز فى مصر أن تكون هذه الهيئه من القضاه أو أن تكون من مجلس الشعب أو على طريقة ودنك منين يا جحا يقولك لازم المرشح للرئاسه يجمع توقيعات عدد معين من أعضاء مجلس الشعب .. أياً كان الطريق فكلها تؤدى إلى المبدأ السابق ذكره

وعن المواد الخاصه بالإشراف القضائى فلن تأتى بجديد فسنعود لما كان معمولاً به فى إنتخابات 2005 والتى فى النهايه وبعد إنضمام المستقلين لحزب الرئيس أصبحت الأغلبيه مؤيده للرئيس ولم يكن المجلس ذو فائده للشعب وهو المجلس الذى شهد حادثة العباره وشجب أعضاؤه ونددوا وطالبوا بالتحقيق وفى النهايه هرب ممدوح اسماعيل

لمن تعلو أصواتهم بإستقلال القضاء .. يا ساده يا كرام هذا وهم تعيشون فيه والتاريخ شاهد على أن القضاه غير مستقلين و لاعبين أساسيين بالسياسه وإليكم أمثله قريبه زمنياً أولها سليمان حافظ نائب رئيس مجلس الدوله فى عهد الثوره والذى كان يتفنن فى تكييف القوانين ووضع الدساتير حسب أهواء مجلس قيادة الثوره ثانيها أنه من بين 8 مرشدين لجماعة الإخوان المسلمون يوجد 2 مستشارين أى بنسبة الربع كما أنه من اخترعوا دستور 1971 على هوى الرئيس السادات كانوا قضاه ومن كيفوا التعديلات الدستوريه على مقاس جمال مبارك كانوا قضاه فقضائنا الشامخ غير مستقل عن السياسه وبالتالى فالإشراف الدولى للأمم المتحده  أوقع وأدل على النزاهه والشفافيه من الإشراف القضائى

أخيراً سؤال برئ له صله بالنزاهه: الإستفتاء على التعديلات الدستوريه هيكون على كل ماده لوحدها ولا هتبقى التعديلات على بعضها بسلطاتها ببابا غنوجها.. يا نوافق عليها كلها .. يا منوافقش عليها كلها

…………………………………………………

بينما يهتم الكثير من المصريين بالأوضاع فى ليبيا فلا يبدو أنهم مهتمون بما يحدث فى البحرين على الرغم من أنه أهم من ليبيا ففى البحرين إن سقط النظام فسيقوم هناك نظام آخر مختلف كلياً عن النظام السابق وليس تغيير وجوه فقط

فهل تكون البحرين الباب لجمهوريات الخليج؟ إليك هذه الحقائق أولاً عشان الجزيره القطريه مش هتقولهالك

- البحرين ينقسم سكانها إلى 81.2% مسلمون و 9% مسيحيون و 9.8% يهود و ديانات أخرى

- المسلمين فى البحرين 66% شيعه و 33% سنه

- الأسره الحاكمه فى البحرين من المسلمين السنه

- يقول الشيعه أن الحكومه اتخذت خطوات لمنح الجنسيه لعرب سنه من خارج البلاد بهدف التأثير على التوازن الديموغرافى

- وجهت مؤخراً السلطات البحرينيه الاتهامات لـ23 شخص من الشيعه بمحاولة قلب نظام الحكم

- قوات الامن البحرينيه اغلبها مسلمون سنه من باكستان واليمن وسوريا والأردن

- البحرين بها الأسطول الخامس الأمريكى

- أول سفيرة يهوديه لدوله عربيه هى هدى نونو سفيرة البحرين فى أمريكا

- فى 2004 البحرين وأمريكا يوقعان اتفاق للتجاره الحره والسعوديه تدين الخطوه

- فى 1998 حل الشيخ خالد بن محمد بن سلمان آل الخليفه محل البريطانى ايان هندرسون مديراً للأمن والمخابرات

- البحرين والكويت فقط بين دول مجلس التعاون الخليجى التى تستطيع أن تقول أن بهما نظام برلمانى

- البحرين تمثل تهديد لإستقرار السعوديه وقطر والدولتين على حدود البحرين وهذا ما يجعل الجزيره لا تهتم كثيراً بالثوار فى البحرين و يجعل الأمير نايف الحاكم الفعلى فى السعوديه الآن يصرح أن ” الحكومة السعودية ستتدخل في حال خرجت الامور عن السيطرة في البحرين”

- الشعب يردد عبارة ” الشعب يريد اسقاط النظام “ ويعتصمون فى الميدان الرئيسى ” دوار اللؤلؤ ” على غرار ميدان التحرير

- هل ستسمح السعوديه وأمريكا وقطر للشعب البحرينى بإسقاط النظام ؟؟