تلاتين سنة وأكتر

تلاتين سنة بتفكر

إنك انت يا سيدي الأشطر

تلاتين سنة

قاعد ع الكرسي العالي

إياك فاكر راح تقعد طوالي

تلاتين سنة واحنا ساكتين

مش فارقة معانا وراضيين

لكن يا أفندينا كفاية

جوعتنا وكمان عريتنا

وصبرنا وكتمنا وسكتنا

كلابك ماليين شوراعنا

بيشوفوا كلامنا وسكوتنا

واللي بيتكلم يتألم

وعلي صوت الحق بيتكتم

علمتنا إزاي نستسلم

لكن يا أفندينا كفاية

لما خرجنا بالملايين

في يناير خمسة وعشرين

قلت علينا دول خاينين

دا شوية عيال طايشين

لا يا مبارك دا مش يومك

فوق بقى واصحى من نومك

احنا خلاص رايحين نتحرر

وفي ميدان التحرير ها نغير

وشمس الحق علينا هاتظهر

وهنكتب بحروف من نور

إن الشعب لما يثور

لازم كل فساد يطــّهر

روح يا مبارك وإياك ترجع

روح من غير ولا عين بتدمع

روح من غير ألف سلامة

ارحل ارحل مش عايزينك

شمس الحق هترجع تاني

على أرض الحرية تنور

والطفل ال جاي راح يكبر

علي رأي وفكر متْنَور

وهايحافظ علي مجد بلاده

وهيعرف من أجداده

إن مفيش ولا حد هيقدر

لإرادة المصري يغير

شعر / محمد رمضان عط