الناس كلها ملهاش سيرة الا الثورة المصرية الجديدة … الثورة المصرية الجديدة ، اللي مع و اللي ضد و اللي يقول انا مالي و اللي يقول و الله الشباب دول رجاله (على اساس انه مش مصري يعني او احم احم مش راجل) و عندك اللي يقول مليش في السياسة  و اللي و اللي .

عاوز تعرف الخبر اليقين ، اقولك على السر اللي بقاله سنين محدش يعرفه الا امن الدولة و انا هنا بتكلم على سر غير سر اختفاء “قوم يا مصري مصر دايماً بتناديك ، قوم لنصري ، نصري دين واجب عليك” ، بص حواليك الاول و اتأكد ان مفيش حد حواليك ، السر … هو … هو ….. انا مش ابوك ، لا ارجع بس بهزر معاك ، السر اهوه و انت في الاخر هتقول “هه مانا عارف ، جبت التايهة يا ابن الهبلة!” ماشي يا عم الناصح

عم ابراهيم الحلاق ، و الخواجة سعيد صاحب قهوة المصريين ، و الواد علي نصه سواق ميكروباص مسطرد معاهم مفاتيح السر . سيبك من الحكايات اللي بيحكوهالك و يقولولك ان البوابين هم مخبرين متخفيين و ان كلهم بيدوا معلومات لامن الدولة (مع ان دا بيحصل) ، بس لو عاوز تعرف بجد اي حاجة في مصر، هما الثلاثة اللي قلتلك عليهم دول ، الحلاق و صاحب القهوة و سواق الميكروباص الغير محشش و ممكن تضيف عليهم سواق التاكسي ، اسأل الحلاق بتاعك اللي بتثق فيه عن اي حاجة بتحصل و هو هيقولك على طول ، الاخبار و الاشاعات و حتى لون ملابس ست هدى الداخلية اللي مدوخة شباب المنيرة الثانوية بنين. و عارف السبب ؟؟ هوا نفس اللي انا قلته ، ان انت لو عندك ثقة في الحلاق تسأله ، فالناس عندها ثقة فيه تقوله الاخبار و دي شغلة الحلاق ، اللت و العجن . و لذلك فان

عم ابراهيم الحلاق عارف اذا كان فيه ثورة و لا لأ و عارف اذا كانت هتنجح و لا لأ و عارف مين هيروح ، و عارف امتي و فين .

اقولك انا بردة كام حقيقة غايبة عنك و فيها حكمة غالية و الناس هتاخد الكلام دا تحطه في الجرايد و تنسبه لنفسها بعدين

شوف يا سيدي ، انا هجيبلك من الاخر ، الشعب المصري كله عارف و متأكد شديد اليقين انه لو هز طوله و وقت اعترض و ثار الحكومة و الريس و النظام كله هيقع ، و الشعب هينتصر ، الكل عارف كده كويس و عاوزين الحرية و خد بالك انا بقول الشعب يعني الناس و شيل من دول الاغنياء و اصحاب البيزنس (الاغنياء برده) و الساسة (الاغنية برده) و اللي شغالين مع الساسة (الاغنية برده) و العمد و المشايخ و الذي منه (الاغنية برده) . طيب امال مش بيعملوا كده لية ؟ افهمك ، الشعب عارف انه هيدفع تمن الحرية دي و عارف برده ان التمن غالي، ناس هتموت و حرايق و عربيات هتتكسر و مدارس هتقفل و كارفور مش هيشتغل …. الناس عارفه كل حاجة و عارفه اللي هيحصل بالظبط و كمان عارفين ان كمان كام شهر و الدنيا هتنام و الناس هتنسى . لكن الناس مش متأكده اذا كانت قادرة تدفع تمن الحرية دي !

  • يعني الواد علي مش هيروح المدرسة بكرة (ناسيين انا التعليم دا بايظ و قلته احسن)
  • يعني العربية اللي شقيت عشان اجيبها سنتين ممكن تروح (نسيت ان لو كان ليك قيمة في البلد كنت هتجيب عربية في كام شهر)
  • يعني ممكن اصحي الصبح اسمع ان اية او نورا او الواد اللي ينقرص سيد اتقتل في مظاهرة (ناسية يا حجة انه في ايامنا السودا دي برده ممكن تسمعي الخبر نفسه بس في حادثة عربية و لا في عبارة و لا اتوبيس ولع و لا قطار ولع برده و لا اتعذب في القسم و لا اتحرشوا بيها منتي عارفه اللي بيحصل يا حجة و لا )
  • يعني مش هعرف اجيب لانشن حلواني من كارفور دا عليه عرض ، و العيال تاكل ازاي ( يا شيخة اتلهي ، شوفي الاكل جاي منين الاول ، منقول بعربيات زبالة و لا فيها ديدان “غير ضارة” ، و لا مش عارف اية )
  • يعني مش هروج الشغل و اخد فلوس ( هههه حلوة فلوس دي)
  • يعني ممكن اروح اتظاهر و الاقي نفسي بسمع بوم و هوب اقابل وجه كريم …………………….

-ايوااااااااااان هنا بقي تسأل نفسك ، هل انت مستعد للمغامرة ، المكسب كتير لكن الرهان غالي ، ايوة انت عارف ان اللي ماتوا في تونس 100 من اصل ملايين ، و ان فرصة الخسارة ضعييييييفة كيك ، لاكين بردة لسة فيه احتمال ، زي العيال بتوع التظاهر ليل و نهار مبتقول : يا نعيش عيشة فل يا نموت احنا الكل

.

.

.

انت عارف انك تقدر تعملها، و هما (الحكومة : اللي هيا الحزب الوطني و شلة الحرامية مش مراتك) عارفين انك عارف انك تقدر تعملها ، و دلوقتي انت عرفت ان هما عارفين انك عارف ، و هما برده عرفوا انك عرفت ان هما عارفين ان انت عارف انك ممكن تعملها ، لكن اللي انتوا الاتنين مش عارفينه هو ..

هل انت مستعد تدفع ثمن الحرية و العيشة الكريمة ؟؟؟

لو جاوبت على السؤال دا هتعرف الثورة هتنجح و لا لأ

“قوم يا مصري مصر دايماً بتناديك ، قوم لنصري ، نصري دين واجب عليك”

سيد درويش

انت معانا و لا مع الناس التانيين

انت معانا و لا مع الناس التانيين

Game Over ya wlad el kalb

Game Over ya wlad el kalb

انا شايف رجالة

انا شايف رجالة

و ستات كمان بمية راجل

و ستات كمان بمية راجل

يالا بنا نبعد يا مسعد ، شارع التروماااي

يالا بنا نبعد يا مسعد ، شارع التروماااي