مين اللي قال؟مين اللي قال؟

1. انِك لازم تتجوزى اول ما تتخرجى؟

2. انِك لازم تلحقى نفسك قبل ال25؟

3. انِك بعد ال30 لازم ترضى بأى ذكر و السلام؟

4. انِك نكرة و فاشلة من غير زوج؟

5. انِك عمرك ما هتلاقى حد يحبك زى ما انت فـ لازم تمثلى؟

6. انِك بتشتغلى بس علشان تصطادى عريس؟

7. انِك ما ينفعش تتجوزى راجل متجوز – ايوة تبقى زوجة تانية يعنى؟

8. انِك ما ينفعش تسافرى و تعيشى برة – ايوة من غير راجل؟

9. انِك ما ينفعش تستقلى بحياتك بعيد عن اهلك – ايوة من غير ما تتجوزى؟

10. انِك لو مديرك بيعاكسك او بيتحرش بيكى لازم تسكتى علشان سمعتك؟

11. انِك لو كلب فى الشارع هاو هاو عليكى مش من حقك تحدفيه بطوبة؟

12. انِك لو كلب فى الشارع هاو هاو عليكى مش من حقك تحدفيه بطوبة؟ – أيوة تانى

13. انِك مش ممكن تدرسى أى حاجة فى اى سن فى اى وقت؟

14. انِك مش من حقك تغلطى … احنا اتخلقنا علشان نغلط و نتعلم من اخطائنا؟

15. انِك مش من حقك ترفضى الزواج لو مش حلمك؟

16. انِك مش من حقك ترفضى الامومة لو مش حساها؟

17. انِك لازم تدفعى ثمن اختيار غلط بقية عمرك؟

18. انِك لازم تعيشى و تموتى قاصر مهما كبرتى سنا و مركزا؟

19. انِك شئ فى عهدة أب أو شئ فى خزنة زوج؟

20. انِك ما ينفعش تقولى لأ .. لأ على أى حاجة مش عايزاها … لأ مش هـ البس كذا … لأ مش هـ اقلع كذا … لأ مش هـ اروح هنا … لأ مش هـ اقعد هناك … لأ مش هـ اسيب فلان … لأ مش هـ اتجوز علان … لأ مش هـ اقبل الاهانة دى … لأ مش هـ اقبل التحكم دا … لأ … ؟

مين اللى قالكم تعيشوا زى الأموات الأحياء … زى الزومبى … يا بدون روح … يا بدون عقل … يا بدون قلب .. يا بدون هدف!