أول مرة أكتب هنا. إحترت. بس لقيت اللي حاصل حوالينا اليومين دول يستحق.
بأفتح الصفحة العامة في الفيس بوك لقيت واحدة صاحبتي معلقة تعليق لخص الحالة كله
Zainab Magdy ايه الوطنية إللي نازلة علينا دي بس….يا ترى الناس واخدين بالهم أن العلم ده برده تبع البلد إللي بيرموا الزبالة في شوارعها و يتفوا و بتحرشوا ببناتها و قالبين كل ركنة منها مبولة

الصراحة عندها حق!
و أنا مش فاهمة. إزاي الواحد/ة فينا اللي ماشي في شوارع مصر القديمة شايف الكنايس و الجوامع و شامم ريحة بخور معتقة مش بعيد واحد من كهنة أمون هو اللي يكون مبخر الشارع وقت ما أنت ماشي فيها يبقي هو ده إحساسه بمصر.
ماتش كورة. لخصتوا كل اللي فات المعتق و كل اللي جاي اللي بنطلع في الروح كل يوم عشان ننحته في ماتش كورة.
لخصتوا زحمة وسط البلد و الضحك علي البورصة و ريحة الشيشة علي الفيشاوي في كرة كاوتش.
كل القشعرة اللي بتملي جسمك و انت بتخطي جوة الكرنك و انت سامع صوت ابتهال دفوف بترن في الفضا من 7000 سنة.
سبت كل ده و مسكت في 11 لعيب ممكن واحد منهم تكون مراته مدياله علي دماغه فا ينكد علينا.
سبت أنت كل الزبالة اللي مالية الشوارع و الدخانة اللي بتاكل في صدرك بقالها 10 سنين و أسوار المدارس و الحتة الي جمب كشك الكهربا اللي مقلوبة حمام و الريحة تموت و مركز مع الفانلة الحمرا.
و كل التحرش و قلة الأدب و مسكت في مستطيل أخضر.

إستغنيت عن حقك في الإختيار و إزاي تحب و تكره بمزاجك أنت و قواعدك أنت و صرخت عشان 22 فرد كوتشي في رجلين اللعيبة!

أنا عن نفسي مكسوفة.
أيوة مكسوفة!!

وطنين بس وقت ماتش كورة و متدينين بس في رمضان و صلاة الجمعة.