من بعد الهجرة وليت
رجعت نشوف الدار فاش تربيت
نشوف الدوار اللي فيه شحال جريت
لكن يا حسرتي واش لقيت
بكا قلبي وبالحزن حسيت
على دواري اللي كان كلو خير
جامع الصغير والكبير
وحضن للمحتاج والفقير
رحﻻت ناسو
بقا غير ساسو
هجرت طيورو
دبﻻت ورودو
يبس ربيعو
غابت شمسو
حليت باب داري
ودموع فعيني تجري
تفكرت بنات ودراري
على سارية الدار
كانت دور تلعب وتغني
كرم وزيتون
نخل وعيون
اش بقا فيك يا دواري اليوم
غير السارية موﻻت النقش المتقون
عالية وديما تبقا
رمز اﻻصالة والنقا
من يد فنان صانع مغربي
فيها تعب وشقا
بزليج بلدي مزوقا
راقية شامخة شاهقة
سنين فاتت
وسارية العز على اﻻصالة حافظت
رعد وشتا قاومت
وفي حر الصيف ناضلت
بأش تحمي حروف العز
ولصورة أجدادنا تعلي وتهز
تحرك القلم اليوم
وقال للحرف عبر
رآه القلب بمعاني الحزن عمر
كتب ء وصل بكا قلبي
لكل من ترك الدوار وليه هجر
يمكن صوت بكايا ليه يوصل
ؤريحت الدوار وعز السارية تخليه يحن
يمكن طيور دواري تولي
وفسماه تحلق وتعلي
ؤ شمسو تشرق وتعود
ؤ بالخير علينا تجود
ؤ وليدات فحيو تجري
وعلى ساريت العز دور وتغني
وأنتي يا سارية من الفرحة علي
وعلى اﻻصالة والعز إياك يوم تخلي

***بقلم سهام نوري***

بني ملال في **14-04-2015