أحمد أنور 

باستغرب قوي من أخبار زي “القبض على ملثم” أو “مقتل ملثم في تبادل إطلاق نيران”…وكأنه مولود ملثم يعني أو ملثم ديه صفة لصيقة به زي “أبو شامة” كدة…..يعني بعد ما قبضت عليه حضرتك مش قادر تميط اللثام وتكشف لنا ده كان مين ولا هو هيروح النيابة والمحكمة ويتحبس وهو ملثم..!!!

أحمد عبد الله 

إقامة العدل في الأرض .. خلال الحياة الدنيا .. هي مهمة الإنسان .. شوفوا شغلكم يا بشر ، و بطلوا تتمسحوا في إيمان العاجزين الكسالى !

يوسف زيدان 

فى الوقت الذى تحتاج فيه مصر لعقولها المفكرة ، للإسهام فى إجلاء المشهد العام العربى ، شديد التعقيد . . استطاع الإعلام دفع معظم الكُتّاب و المفكرين ، على اختلاف توجُّهاتهم ، خارج الساحة . فكفَّ منهم كثيرون عن الكتابة ، و انطوى كثيرون على ذواتهم ، بينما ظل مهرجو الإعلام يُهرّجون و يبهرجون على الناس .

سارة رجائي

فوائد انقطاع التيار الأربعين …. ولا أقولكم خلوها السبع … تفتكروا ممكن يكونوا إيه غير الكتاب إللي بنطلعه من تحت المرتبة ولا رجل الترابيزة المايلة عشان نقراه …
الناس ترفع السماعة وتسأل على بعضها؟
الأسرة الواحدة ترجع تقعد مع بعض تاني وتتكلم؟
الخيال إللي بيوسع في الضلمة أكتر من ما بؤبؤ العين بيوسع؟
التفكير الجاد في فعل كل الأشياء المؤجلة إللي ممكن تضع نهاية لهذا النمط من الحياة اللي وصلنا لإننا نبقى مستهلكين وبس؟ وشكايين وبس؟ وشتامين ولعانين وبس؟

هبة أحمد

انا معجبة بالناس اللى بتعاكس ع الشات وعايزة ترغى بالعافية واحيانا بقلة أدب وتفتح بروفايلاتهم تلاقى صورهم بيصلوا وستاتس التسبيح والقرآن ما شاء الله لا تنقطع …معجبة بيهم بجد مش بهزر، أنا لو عندى نص هذه القدرة على الانفصام أجنن بيها العالم الأجم

مروة أنور

كل ما دخل المطبخ اسمع صوت تكتكه جايه من الجراج حيث حجرة البواب..التكتكه عامله زي صوت الرسايل اللاسلكيه الي كان بيبعتها رأفت الهجان للمخابرات المصريه!!! يكونش بواب العماره بتاعنا جاسوس ؟!!! انا من زمان شاكه فيه و بقول معدل ذكائه المنخفض ده مش طبيعي اتاريه نوع من التمويه  …طب ابلغ عنه و اخلص ولا ايه

أحمد الدريني

“أعطني 3 أطفال وآيباد وأنا أسلمك بعد 3 سنوات عالما في الفيزياء، وخبيرا في الجيولوجيا وشاعرا عظيما”..

أم يابانية.

“أعطني طفلين ورواية لتشارليز ديكنز وكتابا يضم مقالات جورج أورويل، وأسألمك طفلين أحدهما سيغير تاريخ الأدب، والآخر سيكون سياسيا محنكا”.
أم بريطانية
“أعطني طفلا واحدا، ومساحة خضراء للتأمل،وسأسلمك طفلا يغير تاريخ البوذية للأبد”.
أم صينية
“أعطني نصف أطفال كوكب الأرض..وفردة شبشب..وأنا أمشيهم كلهم على عجين ميلخبطوهوش”
أم مصرية.