معلش يا بكره اللي فات

من غير ما نعرف ايه حصل

فين اللي عايش واللي مات

مين اللي سافر مين وصل

محدود على حبة حاجات

نعسان  وفين باقي الأمل

ان كنت حسأل عاللي آت

طب حعمل ايه في اللي اتعمل

……………………………

شكرا على حبة عيوب

متسندين فوق الكتاف

ريحك ما هزش ليا طوب

ولا بان لرمشي عشان اخاف

مستني ايه غير اني اتوب

وامسح دموعي بخيط لحاف

لو تلجي فوق نارك يدوب

حالف ما ابطلش اعتراف

……………………………

افتح شبابيكك يا حرّان في الخريف

واستنى لما هواها يملاك بالورق

وبتشكي ليه لما انت لسه فؤاد ضعيف

شجرة لمون ما طرحش غصنها غير ارق

عيشها على قد الخطى دا الحظ ضيف

وامسح سواد حبرك كفايه اللي اندلق

واقفل بيبان ماضيك ده لسه الدنيا صيف

إحساس ربيع والبرد لابد في الخَلَق

………………………………………..

قنديل برق بين الكهوف والأضرحه

مين اللي ساكن جوه ناره اللي خبت

صرخت عيونه شاهده كل الأجنحه

مرضيش ينام لما السما حوليه بكت

هاب الهوى لما غواه نور الضحى

واستحلى من غيره يشوف شمسه انطفت

خليك كفيف يالي انت راضي تتمحى

غايب مع الموجود  واحلامك مشت

…………………………………….

غربال ومهزوز  بالحمول

بين اللي ممنوع واللي والنازل

حاير ما بين كفين  عدول

ولا حد قاله لحد امتى حتبقى شايل

شفاف ومحفوف بالسيول

سايق ومتساق بين دواير طوق مداول

لو مره حيتوه  في الوصول

يرمي اللي جواه بس قلبه لسه شاغل

………………………………..