سباق وجاري بين دموع وأنين
بين اللي يشكي دنيته
واللي في قلبه حنين
مين اللي مخنوق من الألم

مين اللي عاش فيها اتظلم ..
مين اللي مات
مين اللي سكران ذكريات
وكأننا
من كتر طول الأنتظار
حاسين أيدينا مكتفين
……………………………….
ليا سنين
ماسك على عقلي الهوى
شادد على صدري اللجام
ما يكونش ضهري اللي اتلوى
ولا انحنيت انا في الزحام
طليت بروحي
بين عتوم حزن وجوى
ولقيتني ميت قبل نفسي والكلام
ولقيتني تايه مش هنا ..
ضايع ما بين حلم وركام
………………………………..
البس يا خاين طرحتك
وامشي ورا المقتول طريد
خايف عليل من عملتك
مذلول ما بين جلد وجليد
لو كنت حاسس قوتك
ليه تستخبى ف توب حديد
بكره الغريق في مخدتك
يحلم بتاره من العبيد
…………………………
حلمي على كبر الزمان
من بين ضلوع فرع الشجر
مش مستخبي لكنه بان
لما انتحب بينه المطر
يجري على قطف اللي كان
ولا خضار طلع الثمر
صرخ اللي مشلول بالايمان
واتعرى حلمه على الحجر
………………………………
سيبك من اللي هواه بلاش
قلبه على قد الجوى
دارى جراحه بتوب قماش
واتغطى بالنار في الهوى
دبل اللي فيه  بين اللي عاش
والريحه فايحه بغير دوا
سهران ياليل بعنين وحاش
على قد ساعات الخوى