دجال وبحكي ع الودع والرمل

صعبه الليالي تعود

وحبيبي مش حاضر

وكتير بقول موعود

بالفكر والخاطر

…….

مين يقدر يقول

ان السلالم طالعه فوق

 مش نازله تحت

مين كان يقول

 ان الدموع للحزن سوق

 والفرح بخت

تسلم ايدينا اللي اشترى

تسلم ايدينا اللي افترى

تسلم يا دين

باع بالرخيص

والكفر موضه مسطّره

رابعه بفستانها الجديد

والدنيا عيد

شاهده على دي المسخره

مين اللي فرحان بالنشيد

والدمعه نارها منوره

مين اللي مدبوح من السكات

مين اللي خجلان من الآهات

سيبك من الحلم اللي مات

انا دين ابويا اللي اتهرى

بين ناس متعرفش السكات

وناس حالتها متأخره

قالولي كافر

او صليبي

بحكي على كل المنابر

والفقر عمره ما كان نصيبي

سيبت الجروح فوق السطوح

يمكن ده حظي أو نصيبي

وان كنت يوم حعرف ابوح

طب حعمل ايه ما هو عيبي

ساكن في بيت مليان كلام

مين راح لفين .. مين باع بكام

ناس حاسبه دنيتها بخساره

والدين ده عمره

ما جه جنب بواب العماره

ولا حتى عارف يستخبى

وان قالو الحق  واحده ماتت

بينادوا فينه عم طلبه

عم طلبه

ده حد طيب من بتوع أيام زمان

كان يشتري ملبس وموز

ويجري ورا ولاد الجيران

كانوا بيتلموا عليه

كانوا بيحبوه بجد

بياع فقير

بيبيع فطير

وعمر دينه ما أداه لحد

كان لما بيقولوا الصلاه

بيسيب بضاعته

ويسيب أمانته على هداه

بايع هواه

طالب رضاه

والحب جايله من فوق لتحت

والحب بخت

شايل مع هموم الزمان

حبة حنان

باسم جبينه

ياريتني عشت معاه سنينه