حينما تتعانق الموسيقي مع الكلمات الشعرية العذبة فأبشر ولسوف تأخذك إلي عنان السماء .

موسيقي جليل شهناز مع كلمات قصيدة”يابوي” للشاعرة السودانية نضال الحاج ، أترك لكم الحكم والاستمتاع

—————–

بقول انا فيك..
يا زولا كتب بدمو لي اعيش
وحتحت باقي مخلاية الزمان..
كان يلقي لقمة عيش
ولما كسر جناحات الزمن بالقول..
نبت جوه الكلام الريش
وجاني قصيد بحسو كلام قوافي شتر..
واحسو نبع من المافيش
وما فتشت فيهو القول..
ولا فتشت فيهو القول
ابوي زولا محال القالي زيك زول
ابوي خريج شرارت الخلاوي..
الضاوية فينا عقول
وأبوي صمتا..
كسر مجداف مراكب في بحر مشلول
كتب بي خط عريض واضح….
أنا الزول التعب منو الزمن دون ما يصيبو تعب
فتات أحزان صبح مكتول
أبوي راجلا مسك زمن المأسي المر
رقص.. غنى.. وكتب مسدار..
على تقابة الخلوة وكلام معقول
طرق أبواب منى الايام بلا ما يلقى باب مقفول
ابوي زولا محال القالي زيك زول
فتح شرفات طقاطيق الكلام الصح
وأبوي جرحا دخل ضهر الزمان الغش
صبح بنتح بلا ما يمسى..
في أسف الزمان الليل
صباحو صبح عشان خشاهو أبوي بالليل
بكى الزمن الذليل وحوح
أبوي راجلا مسك طورية روح هسع البلدات
وناسا شدوا أوتار الغنا الشترا ورموا النمات
أبوي وطنا بكوسو جواي..
بلاقي سكن معاني الذات
والاقي ابوي مسطر في الفؤاد غنوات
وابوي زولا محال القالي زيك زول
سكن في بيت مقرو دماي..
ووصفو على الدواخل حي
وكل ما يكوي قلبي القول..
بجدد تاني ليهو الكي..
وأجددو تاني ليهو الكي
عشان القاك أبوي قدامي..
في جرح القصيدة الني
وأفتش ليك ابوي وينو؟؟ أبوي وينو؟؟
اقوم يا يابا عز الليل بلا قوة ومروة حيل
وبحلمبك ابوي كرما دفر في سيل
وابوي حنان عرض منبع مجاري النيل
وزولا لما اوزن قلبو بلقي جبل مقامو تقيل
ولما افارقو بتأوه بساهر الليل
وبلقي عذابي في جواي واسند الويل
كتب عنك ابوي الحق..
وابوي عود الاسي الما انشق..
وابوي حارا مع الحنية كالنيران تبقبق بق
وزي مرقا صمد اعوام..
هو زي مرقا صمد اعوام
بس الا ابوي دوام صامد..
بلا المرق الغشاهو الشق
وابوي مسمار.. وفكة ريق..
وموية تبرد النارين
وابوي زول عادي لا هو عنيف ولا مسكين
وراجلا غنا في وتر الزمان الغش..
سكن جواي مع العينين
وابوي صبا العنت حبات عرق بلت يباس الطين
ابوي غالي ولا هو الغالي في سوق العذاب بنباع
ابوي شوقا سكن قلبا صبح ملتاع..
ابوي دخر الزمان الحاضر.. الجاي.. وزماني الضاع
وابوي عزف علي الارض الفتات الحان..
وبالسلوكة غنا علي التراب ايقاع
ابوي انسان.. وما كل زول بكون انسان
ابوي سكنتو في نتح الجرح.. في جوفو
رغما انو مضغة فرحة شتت عالم الاحزان
ويوم جيت عن ابوي اقول..
ابوي محال القالي زيك زول
فجر وجع الكلام بركان.. كتب عنك بلا ميزان
نضم كلمات بدون الحان.. وخشيتك بلا استئذان
كتب عنك..
ابوي زولا كتب عنو ..
و كأنو ولا كتب لي والدو قط فنان
أبوي الصح نبع من جنة في الدنيا..
وسكن جواي مع الشريان
ابوي زولا عشقتو أنا..
ولا كل البعيش بعشق
عشقتك يابا حتى الموت..
فضلت اقول بريدك موت
وما عاش ولا كان البمسك يا أبوي بي شر
وانا الفي الدنيا عايش..
عشان أوفيك حبه بس من دين
وأبوي زولا عادي لا هو عنيف.. ولا مسكين
ابوي إنسان ضبح طيف المعاناه الشر..
شوالنا لحم جلودا ضهر
وجابني على الوجود إنسان..
كتب بي خطو قول أخضر
ابوي محال القالي زيك زول
بدل القاك غناوي اشد ليها وتر أوسدا فيو
لقيتك بالنبض مكتوب دق… دق… دق..
ابوي بهواك…..
بدل انسج خيوط العنكبوت كلمات..
نسجت حروف عشان تنطق تغني هواك
بدل اغزل قطن ابيض زرعنا زمان..
غزلت قصيد وسميت روحي قلت غناك
هــــــــــا….
سميت روحي قلت غناك..
قسم كضاب يمين القال علي غنيت..
وشن غنيت ابوي أنا فيك
ابوي يا كلمة راجية الفال..
وشن كتبت حروفي عليك
بدل أسقيك كاس من ريد..
سقيتك يابا جرعة حن من الشريان
اريتا تجيك..
واريتا حروفي يابا تغني تكتب فيك
واريت يا يابا في اقرب وقت القاك
واقول للناس…..
ابوي زولا محال القالي زيك زول