بعد قيام ثوره 25 يناير العظيمة، ثم ثورة 30 يونيو الفخيمة، تم انتخاب “ولاحظ كلمة انتخاب دى” الجمعية التأسيسية التى تقوم بوضع الدستور، طلب رئيس الجمعية من كل عضو التعريف بنفسه واقتراح المادة الأولى فى الدستور الجديد…

مندوب الإسلاميين
قام ممثل الأغلبية وهو من التيار الأسلامى فقال الحمد لله وكفى، وصلاة وسلاما على المصطفى… أما بعد أيها الأخوة الأحباب اقترح أن يكون البند الأول كالتالى: جمهورية مصر العربية دولة إيمانية وتطبق الشريعة الإسلامية، ولو كره الكافرون.. أقول قولى هذا وأترك لكم باقى البنود لتتصرفوا فيها كما شئتم .. يرحمكم الله

ممثل المسيحيين
ثم تحدث مندوب الكنيسة المصرية فقال: بوركتم أيها اللأخوة وبارككم الرب فأنتم مرسلى العناية الإلهية للشعب العظيم لتضعوا له ميثاق حياته القادمة وليكن دستورنا يا أعزائى، المجد لله فى الأعالى وعلى الأرض السلام وبالناس المسرة فماذا يكسب الإنسان إذا كسب العالم وخسر نفسه وفقكم الله لما فيه مصلحه هذا الوطن

الجيش
أيها السادة كما تعلمون أن الجيش هو حامى حمى الوطن والمحافظ على ثرواته وترابه وأذكركم…..وأذكركم ….وأذكركم….ولكل من تسول إليه نفسه
الجيش حمى الثورة….فاهمين….
والجيش والشعب إيد واحدة فاكرين…
أما البنود الخاصة بالجيش هتتكتب فى الدستور بالحبر السرى لأسباب أمنية وتحيا مصر.
ولذا أقترح أن يكون البند الأول الله الوطن الجيش …

نقيب المهندسين
فلنعمل جاهدين على إنشاء دستور محكم ذى أساس متين وبناء شامخ يعلو مادة فوق مادة يربط صواميل جميع طوائف الشعب ويسخر طاقاته للتقدم ولا ننسى أن نحافظ على البيئة ونعتمد الدستور من هيئات الجودة العالمية لذا أقترح أن يكون البند الأول فى الدستور هو اتحاد وتماسك بناء الجمهورية المصرية ومواطنيها

نقيب الممثلين
أيها السادة نريد دستورا يحافظ على حقوق جميع الكومبارس فى هذا الوطن وليس دستورا للنخبة والمشاهير فقط دستور يعمل” كلوس أب” على الفقراء وينهى هذا “الفلاش باك” الطويل الذى عشناه لمده 30 عاما أيام المخلوع بنهاية سعيدة مافيهاش أى دراما قبل تترات الغضب من الفئات المهمشة ثم انحنى ليحى الأعضاء من الجمهور الذى صفق بشدة ووقف طابور عشان يتصور مع الفنان المشهور

نقيب الطيارين
حمدا على سلامة الوصول للجمعية التأسيسية ونتمنى لكم دستورا سعيدا …أوافق على ما قاله الأخوه الزملاء وأقترح أن يكون البند الأول فى الدستور كالتالى جمهورية مصر العربية دولة حرة مستقلة الأجواء وتعمل على راحة مواطنيها.

نقيب الموسيقين
نريد دستورًا متناغمًا مع العالم ويعمل على وجود هارمونى مشترك بين جميع فئات الشعب ليكون الشعب لحنا واحدا موزعا توزيعا جيدا على كافه أطرافه فى سيمفونية عمل رائعة بدون أى مواطن نشاز يغرد خارج السرب أو الفرقة…
ولذا اقترح ان يكون البند الأول ….الشعب هو المايسترو ….لهذا الوطن

الدكاترة
سيدى الرئيس ….الأطباء أبناء أبو قراط يريدون دستورا عادلا يجبر الكسور المجتمعية ويعالج الخلل الطبقى ويمنع جرثومة الفساد من الانتشار ويحد من الأوبئة المتفشية فى النظام الحكومى…
وأنا عايز أشهدك ياسيادة الريس….
يعنى ينفع دكتور محترم بقاله 9 سنيين فى الكلية يتخرج يشتغل ب200 جنيه فى الشهر ….دول يعمل بيهم ايه؟؟؟ يشرب بيهم بيبس…
لذا أقترح أن يكون البند الأول فى الدستور هو المساواة بين جميع أفراد الشعب قانونيا وماديا…

الصيادلة
دواؤنا وعلاجنا يا سادة فى حفظ الحقوق والواجبات…. وتحديدها وتعريف جرعاتها بدقة وعدم السماح بأى تفاعلات مجتمعية أو تأثيرات خارجية تؤثر على حالة الاستقرار الداخلى للبلاد، ويجب أن نتجرع أى علاج للاقتصاد المتردى ولو كان مرا…ويجب محاربة الفساد ومراقبه كل مسئول قبل الأكل وبعده …وعايزين روشته محكمة لمعالجة البطالة …بدل _اللبخة_ اللى احنا ماشيين عليها دى ….ولذلك اقترح ان يكون روح دستورنا هو مبدأ ان الوقايه خير من العلاج…ولو ان الأخوه فى النقابه هيزعلوا منى ….

الصعايدة
فى هدوء وشموخ وقف حمدالله عبدالجوى المتعال الأسيوطى …مندوب الصعيد….وجال…
ياسياده الريس عايزين دستور يهتم بالصعيد وولاده وبلدياته وحدياته ويطورهم ويعلمهم ويشغلهم وجبل كلاته ….يحترمهم
ويشركهم فى بلاوى بلدهم الى هما شايلينها شايلينها…وطايلاهم طايلاهم….
ونطالب بمنع النكت ….
ومش عايزين حاكومه …ماشفناش من اى حاكومه حاجه عدله
من النهارده مفيش حاكومه….احنا الحاكومه
ملوحا بنبوته فى الهواء…..
ولم يجرؤ اى من الأعضاء على الأعتراض …او التعقيب… او التصفيق

أهل النوبة
ثم وقف عمربوسيدون الأسمر مندوب النوبة وقال…
نوبا ويا ايوا تونيللى ايدين ايجوو اسسن ايجوو واو نوبا واباسينجرييين ….ايديندوبيا…نوباويا….
نوبا ويا ايوا تونيللى ايدين ايجوو اسسن ايجوو واو نوبا واباسينجرييين ….ايديندوبيا…نوباويا….
نوبا ويا ايوا تونيللى ايدين ايجوو اسسن ايجوو واو نوبا واباسينجرييين ….ايديندوبيا…نوباويا….
النوبة هى مصر ومصر هى النوبة ياهضرات….
والسلام عليكم ورحمه الله وبركاته

زعيم الفلاحين
ياسياده الريس عايزين دستور يكون كده طازه وصابح …ومالوش فى الكيماوىولا السباخ ويلغى الجمعيه الزراعيه الى بتتحكم فى الفلاح وتبيع السماد فى السوق السوده….وتوفر لنا ميه نضيفه للزرع …ومبيدات نضيفه برده مش من المسسمه بتاعه اسرائيل …ويلغى البتاع اللى اسمه الجولف ده… الى كل شويه ياخد الميه بتاعه الزرع ويمنع البنا على الأرض الزراعيه ويساعد الشباب على زرع ارض جديده فى الصحرا البعيده

ريس العمال و الصنايعيه
العمل عباده ياريس …عايزين نشغل ولادنا فى مصانعنا ونحافظ على حقوقهم …..عايزين دستور يحافظ على الأوفر تايم …. ويدافع عن حقوق العمال عند اصحاب الأعمال ….ويؤكد على ان الخميس والجمعه اجازه كل اسبوع وبأجر مضاعف…عايزين بيئه صالحه للعمل والأنتاج …واللى يحصل عنده زياه فى انتاج الأطفال لازم كمان مرتبه يزيد ….. ياريس ….عايزين دستور ادارجى مدقدق متظبط…مش متحفلط ولا مليط … من غير رايش وواغش مترجرش ومخدوم عليه كويس …راشق على السن…مابيحدفش ولا بيلعب لا يمين ولا شمال …ولو مظبطش يتبدل فى ثانيه….

زعيم اليساريين
ايها الرفقاء …. احيكم واحييى جمعيتكم الثوريه …واحب اقول للأخ فرانسيس فوكوياما نهايه التاريخ لسه ماجاتش ….واحب اقول للأخ الرفيق صمويل هنجتون لسه صراع الحضارات شغال وماخلصش …..واحب اقول لريس الجمعيه عايزين دستور يحفظ المكتسبات العماليه الثوريه وتحالف قوى الشعب القويه ويوفر الضمانات الأجتماعيه لكل افردا الشعب ….

ممثل الليبراليين
ايها الساده ملخص موقفنا فى دستوركم الأغر هو الحرية …لا نريد سوى الحرية للفرد والمجتمع وهى كفيلة بصنع التقدم والرخاء والرفاهية والأزدهار الأقتصادى والأجتماعى
حريه الفرد وحريه المجتمع…..حريه الفكر وحريه العقيده….حريه العلم وحريه الفن….حريه الرأى وحريه التعبير ….

دكاترة الجامعة
الهدف الأكاديمى للدستور … هو توسيع المشاركة النسبية للمحاور الطولية والعرضية للمؤلفات الطبقية لشرائح الشعب …واعتماد طريقة توثيقية تنشيطية تفاعلية لتبادل السلطة وتوافق مجتمعى حول الطرق التناسبيه التقريبيه لأداره الشئون الإقتصاديه والأجتماعيه للشعب…ووضع مفهوم واضح للمشاركه الشعبيه المجتمعيه والنخبويه التقدميه لأداره شئون الوطن …

التجار
سياده الريس الدستور مناوله مش مقاوله ….عايزين دستور يعمل هات وخد….دلوقتى ….كاش مش قسط… ويدور العجله ويرمى ربح سريع على الشعب كله…ويشغل اللى مالهمش شغل ويزود شغل اللى شغال….لأن الميه لو ركنت تعفن على طول ….

المحامون
سيادة الرئيس… السادة القضاة…ان الدستور الماثل امامكم….لابد ان يحقق طموحات الشعب …واهدافه فى الحياه الكريمه…واحذر كل من لا يعمل لهذه الأهداف …باننا لن نسكت بعد اليوم….ولن يستكين الشعب المصرى لأى ظلم او ظالم…مضى عهد الديكتاتوريه فى مصر ياسادة…
واخيرا فأنى اطالب بتطبيق اقصى العقوبه على كل من لايعمل من اجل هذه الأهداف.

المحاسبون
سيدى الرئيس يجب ان نعلم ان لكل اجل كتاب… ولابد عن يوم ويجى فيه الحساب
نطالب ان تكون الضرايب تصاعديه والجمارك تنازليه…الميزانيه تعتمد من جمعيه المحاسبين والمراجعين قبل ما تتعرض على مجلس الشعب…
وضع حد ادنى و اقصى للأجوروالخدمات ومنع المحسوبيات وعدم سريه الحسابات للمسؤلين والمسؤلات….

معلم الجزارين
يامعالى الريس عايزين دستور مشفى احمر من غير شغت لبانى ورور ….كفايه الجملى اللى كنا فيه…. خالى العضم والدهن…سهل الهضم وحلو الطعم…والأسعار تكون على قد ايد كل مواطن…واى تدخل خارجى زيه زى الدبح بره السلخانه… مرفوض …مرفوض …مرفوض

الاعلاميون
الأعلام هو السلطه الرابعه وهو ضمير الأمه …وعين الشعب…واواعدكم ان استضيفكم جميعا فى برنامجى ع الفضائيه لتتحدثوا جميعا عن عظمه هذا الدستور
لذا اقترح ان يكون البند الأول فى الدستور هو السلطات فى الجمهوريه اربعه …تشريعيه وتنفيذيه وقضائيه واعلاميه…

الطلبه
التعليم ياسيادنا مش مظبط ….ومش روش …عايزين تعليم يفهمنا العالم ويعرفنا ازاى نتعامل معاه …..وسورى يعنى مش حقدر امضى ولا اكتب معاكو اى مسودات الا لما تنزلوا الدستور على الأى باد …وتوزعوه على الطلبه فى الدارس والجامعات

الرياضيين
عايزين دستور مودرن حديث وسبورلذيذ وخفيف سهل الهضم وكله قيم غذائيه وحريه عاليه وينشر الرياضه ويخليها حق لكل مواطن عشان نخش الأوليمبيه….ونشوف الشعب كله بيمارس الرياضه بدل ماهو بيجرى ورا الأتوبيسات…ويلعب كوره بدل ما يضرب شماريخ فى الماتشات ….ياابوالكباتن…عفوا ياسياده المستشار

الشرطه
ايها الساده …..على الطلاق الشرطه فى خدمه الشعب ….ومش قايل اى حاجه تانيه…

الشباب
هتف مندوب الشباب …من ايام 25 يناير وانا قاعد اقولكم عيش ….حريه ….عداله اجتماعيه …ترجموها انتوا بقى …

فن نهايه الجلسه تفاءل الجميع واستبشروا خير بدستور شامل جامع مانع متسق حيوى للأجيال القادمه….
فى خارج القاعه وقف كل من ….

الفنانه اللوذعيه شذا عرفى ….ممثله منظمه” راقصات بلا حدود” تطالب بحق المنظمه ونقابه الراقصات بالإنضمام للجمعيه التأسيسيه لصياغه الدستور

الأستاذ بهاء احمد ابو البهاء…. ممثل” الجمعيه الشرعيه للمؤمنين “….يطالب بتعديل وضع الأقليات الدينيه فى الدستور الجديد

الأستاذ سامح شمالى … عن الأناركيين… يطالب بالاسلطويه ورفع يد الحكومه عن الشعب ….ويهتف…_ضد السلاطه من اجل العيش …..عفوا…. ضد السلطه من اجل العيش_

الأنسه لمياء الوجدى …ممثله حركه ” نساء بدون غطاء” العالميه …تبدى اعتراضها على الجمعيه التأسيسيه و كثير مما جاء فى اقتراحات الدستور …بطريقتها الخاصه جدا ….

مجموعات كبيره من شباب الألتراس “وايت نايتس “و”ريدديفلز” و”جرين ايجلز” و “يولوفانز”…..يطالبون بتمثيلهم فى الجمعيه التأسيسيه والا مفيش كوره هتتلعب تانى فى مصر…

مجموعه كبيره من الملتحين والمنتقبات يمثلون التنظيمات السلفيه الجهاديه… والسلفيه الوهابيه …وسلفيو كوستا … وسلفنى شكرا ….ويطالبون بدستور يطبق الشريعه…

مجموعه كبيره من ذوى الأحتياجات الخاصه….يطالبون ان يكون لهم عين الأعتبار فى الدستور الجديد

وحين عرض الدستور للأستفتاء تم رفضه من الشعب بنسبه 99% وذلك للأختلاف البند الأول عما اراده ممثل كل طائفه …فقد كان نص البند الأول كالتالى :
الشعب مصدر السلطات…