( حامد ) يؤمن بمنطقية مهمته وبديهية دوره الكوني وبأنها لحظة مقدسة وفارقة في تاريخ السماء والأرض تلك التي يطل فيها على الناس وجهه المرتعش بنشوة اليقين وحلاوة الإيمان وعظم المسؤلية التي يحملها .. وجهه الذي يشرق تحت اسم القناة المكتوب في الزاوية اليمنى العلوية بصحبة شعارها بينما يتتابع أسفل وجهه المشرق ظهور أعلام صغيرة للدول وبجانب كل علم رقم الاتصال الخاص به .. تحت ابتسامة ( حامد ) المنتشية تتوالى رسائل الـ sms المتعاقبة التي لا يتوقف البشر العاديون أبدًا عن التأكيد من خلالها على حبهم لله ورسوله ولـ ( حامد ) وعلى عمق انتماءهم وشدة ارتباطهم وتمسكهم وتوحدهم بهذا الدين .. يؤكدون على عدم توقف دعواتهم بأن يغفر الله ذنوبهم ويرضى عنهم ويتجاوز عن سيئاتهم ويدخلهم الجنة ويفرج كروبهم ويزيل همومهم ويمحو أحزانهم ويشفي مرضاهم وينجح أبنائهم ويشغّل عاطليهم ويسدد ديونهم ويرزقهم بالزوج المناسب والزوجة المناسبة كما يؤكدون بالمناسبة أن لديهم تخفيضات كبيرة على أسعار أنواع مختلفة من العسل الذي يشفي من السرطان والإيدز والالتهاب الكبدي الوبائي والفشل الكلوي وهشاشة العظام والعقم وآلام المعدة والقولون العصبي وأمراض القلب والرئة وحب الشباب وتساقط الشعر والتهاب المفاصل والاكتئاب ..

وجه ( حامد ) المشرق يقول للناس : ( الحمد لله نحمده ، ونستعينه ونستغفره، ونعوذ بالله من شرور أنفسنا وسيئات أعمالنا ، من يهده الله فلا مضل له ، ومن يضلل فلا هادي له ، وأشهد أن لا إله إلا الله وحده لا شريك له وأشهد أن محمداً عبده ورسوله … بطّل سجاير .. بطّل المواقع الإباحية .. بطّل نظر للنسوااااااااااااااااان .. هاتبطّل إمتى ياجميل ؟ .. هاتبطّل إمتى ؟ .. هاتبطّل إمتى ؟ .. يعني .. مش مكسوف .. إن ربنا يشوفك وإنت بتعمل كده .. مش مكسوف .. إن ربنا معاك وشايفك وإنت بتشوف الحاجات دي .. مش مكسوف إن ربنا قريب منك .. إداك عنين .. تروح تزني بيهم ؟!!! .. إداك لسان .. تنافق بيه ؟!!! .. إداك فلوس .. تروح تسكر بيها ؟!!! .. يا أخي حرام عليك .. يا أخي ارحم نفسك .. يا أخي توب بقى .

واحد باعت يسألني بيقولي يامولانا ما هو حكم الشرع الهندوسي في أداء صلاة جماعة داخل البيت ؟ .. لا حول ولا قوة إلا بالله .. يا أخي الكريم سامحك الله .. هي الهندوسية أصلا فيها صلاة جماعة سواء داخل البيت أو خارجه ؟! .. إزاي لغاية دلوقت مش عارف أساسيات دينك ؟! .. واحنا قاعدين بقالنا 100 سنة نوجع في قلبنا ونبح في صوتنا عشان الناس تفهم وتتعلم وتمشي مظبوط يقوم ييجي حد بعد كل ده ويسأل عن شيء من بديهيات العبادة ؟! .. استغفر الله العظيم يارب .. أرجو إنكو تنتبهولي أكتر من كده يا اخوانا أعزكم الله . الصدق إللي أنا بأطالبك بيه .. ماتكدبش .. ماتقولش مش قادر .. إنت تقدر .. ماتكدبش .. ماتقولش أنا عايز أتوب .. قول أنا مش عايز أتوب فيارب ارزقني إني أنا أتوب .. ما تكدبش .. ماتقولش أصل عندي ظروف .. معندكش ظروف .. قول أنا مفتون .. ماتكدبش .

هاتوب إمتى ؟!!! .. مستني إيه ؟!!! .. الملك صبر عليك كتير ، وسترك كتير ، وسامحك كتير ، وسابك كتير ، ويسّر لك كتير ، وجددلك كتير ، وأمهلك كتير .. بس لما يأخذ … ) يرفع ( حامد ) قبضته المضمومة في الهواء وينزل بها بقوة على المكتب الذي يجلس عليه بينما تتسع الابتسامة في وجهه المشرق وهو يتابع قائلا : ( إن أخذه أليييييييييييييييييييييييييييييييييم .. شديييييييييييييييييييييييييييييييييييييييد .. ممكن قلبك يتغير بعد ما عملت كل الذنوب ؟ .. شربت مخدرات وزنيت وسرقت واتفرجت ع النت والقنوات ومشيت مع بنات ورقصت وغنيت ونهبت وقتلت وبعد كل كده ممكن أبقى إنسان كويس وولي من أولياء الله الصالحين ؟ .. آآآآآآآآآآآآآآآآآه ممكن .. إنت متأكد يا شيخ من الكلام ده ؟ .. آآآآآآآآآآآآه متأكد .. يعني الكلام ده ممكن يحصل إنت شفته قبل كده ؟ .. أيوة أنا شفته .. عمومًا ماتنسوش أعزائي وأحبائي وإخوتي في الله إن إللي عايز يسأل أو يستفسر أو يقول أي حاجة يتصل على الأرقام اللي بتظهر قدامكو على الشاشة .. فاصل وارجع لحضراتكو بإذن الله تعالى ) .

* * *

مقطع من رواية ( سوبر ماريو )

تصدر قريبا