مش كليشيهات و كتابة عن السنة اللي ماشية كمان 48 ساعة. لأ. أنا بقالي فترة بحاول أركز و أشوف إيه اللي حصل بالظبط معايا من جوة و من برة.

السنة دي سنة قوية جداً علي مستويات كتيرة. طب نبتدي بالحاجات الكويسة . الأول فتحت عيادتي ( أنا طبيبة أسنان) و دي كانت خطوة كويسة ممكن أبني عليها إستقلالي التام عن البيت خلال ال 3 سنين الجايين دول. بس كان بالنسبالي الحدث الأجمل و الأسعد هو صدور ديواني الأول ( تنورة) و نفاذ الطبعة الأولي منه, و 4 حفلات توقيع أجمل من بعض, بس الأجمل هي الروح اللي صاحبت الديوان ده و هو لسة مطبوع علي ورق A4. كمان الرائعيين دايما سحر الموجي, زينب مجدي اللي ما سابونيش دقيقة واحدة. دايما هنا و دايما معايا لحظة بلحظة و في كل حفلة و كل خبر جديد عن الديوان.

ده فرق علي مستوي جوة؟؟ جداً! و علي برة؟؟ ماهو لما جوة يتعدل برة يتعدي منه.

سوقت! أخيرا إتخلصت من عقدة سواقة لازمتني 3 سنين مش قادرة أركب عربية و أسوقها. و فاكرة إن أول مرة سوقت كانت معايا سارة صاحبتي و العربية في مشوار 4 كيلو متر طفت 18 مرة! بس و إييييه يعني!

كمان إشتغلت مع ناس صحابي جدا في مجال الكتابة. أجمل حاجة إن الناس اللي بتشتغل مع بعض يكونوا بيحبوا بعض بجد.

إيه تاني!

أه, رجعت ألعب رياضة بعد توقف حوالي سبع سنين! و خسيت! و ده في حد ذاته إنجاز عبقري.

أحمد زيدان كمان إداني فرصة جميلة إني أكتب هنا. شكراً.

محدش يقولي اخبار القلب إيه السنة دي. بلاش السيرة النكد دي!

من جوة بقي بقيت أهدي, أركز, أقل إنفعال ( ما يمنعش أني إتخانقت خناقة محترمة الأسبوع اللي فات) كمان قدرت أتكلم عن صاحبي اللي مات من 3 سنين من غير ما صوتي يتخنق و إيديا ترتعش. عارفة يا حمدي أنك ما عودتش زعلان مني.

ناس قربت أكتر, و أنا فرحانة بيهم و متدفية وسطهم. و ناس بعدت ( خدوا الشر و راحوا! أنا كنت ناقصة أصلي!)

عرفت إن تنورة عامل أفضل مبيعات في الشروق. إتقبلت في منتجع للكتاب في الجونة ( و حياة الغاليين تمسكوا الخشب و تكبروا كده و حابس حابس لحسن أختكوا نجمها خفيف أوي!)

إممم, السئ في 2009

أتنين صحاب طلعوا سككككككاااا أووووييييي! بزيادة يعني!

مش قادرة أعمل إتفاقية سلام مع أهلي.

اخويا سافر و سابنا!

العلاقات العائلية سيئة أخر حاجة!

خدت مقلب مش لطيف من واحد افتكرت اني ممكن أحبه.

رجعتلي نوبات القلق و الكوابيس تاني!

بس في المجمل هي سنة جميلة بوجعها و فرحها.

و إنتوا بقي؟؟

إحكوا!