آخر مقال كتبته قبل القبض على كان عنوانه ” فى أى جانب تقف إسرائيل ؟ ” … إنبسطت جدا لما إفتكرت إن آخر جمله فيه كانت ” وأنا بحب بلدى ” … شىء جميل لما جملة زى دى تكون آخر جملة كتبتها فى آخر مقال ليا. 16 / 7 / 2011

حينما حكم القضاء الإسرائيلى على موشيه كاتساف الرئيس الإسرائيلى الأسبق بالسجن بسبب جريمتى إغتصاب ، أرسل حاخام يهود رسالة تأييد لكاتساف .. أعتقد أنه كان المفروض توصلنى رسائل تضامن من حاخامات يهود ، إلا لو كان الحاخامات مبيدعموش غير المغتصبين !!!. 18 / 7 / 2011

مصر حصل فيها 5 انقلابات عسكرية فى العصر الحديث ، انقلاب عرابى 1882 – انقلاب محمد نجيب 1952 – إنقلاب عبدالناصر 1954 – انقلاب مبارك 1981 – انقلاب طنطاوى 2011 … عظيمة يا مصر !!! . 18 / 7 / 2011

بعد إنقلاب 1952 ، قام الضباط الأشرار بإطلاق سراح الإرهابيين المنتمين لجماعة الإخوان المسلمين اللى تم الحكم عليهم فى قضايا تفجيرات داخل مصر ، ولم يتم الإفراج عن أى من المعتقلين السياسيين .. بعض الناس طالبوا عبدالناصر بالإفراج عن المعتقلين السياسيين فقال لهم أنه لا يوجد معتقلين سياسيين وانما يوجد بعض العملاء لدول أجنبية … أحد المعتقلين الوطنيين أرسل حينها خطابا لعبدالناصر يقول فيه : ” نعم ، نحن عملاء لدولة أجنبية لا تعرفها أنت ، اسمها مصر ”

تذكرت هذه القصة حينما سمعت تصريحات الجيش بأنه لا يوجد ثوار خلف الأسوار ، ثم تلميحاتهم المتتالية بخيانتى لبلدى

يا أعضاء المجلس العسكرى ، نعم أنا عميل لدولة أجنبية لا تعرفونها ، إسمها مصر . 18 / 7 / 2011

زمان كنت ببذل مجهود علشان أفرق بين عملاء أمن الدولة وعملاء المخابرات … دلوقتى مطلوب منى إنى أفرق بين عملاء الأمن الوطنى وعملاء المخابرات العامة وعملاء المخابرات الحربية …. أحا ، هو إحنا بنمشى لقدام ولا لورا ؟؟ 18 / 7 / 2011

قلبى بيتقطع كل ما أشوف الناس فى التحرير على التليفزيون … أنا مكانى مش هنا ، أنا مكانى فى التحرير … عاااا 18 / 7 / 2011

لما السادات كان بيتكلم عن السلام مع اسرائيل ، كانت الناس بتقول ” حكمة السيد الرئيس ” .. لكن لما مايكل نبيل يقول نفس الكلام ، يبقى علاقات مشبوهة مع العدو … شيزوفرينيا. 19 / 7 / 2011

السادات أدين واتسجن فى قضية تجسس لصالح ألمانيا ، وهو نفسه اعترف بكده فى كتابه ” البحث عن الذات ” ، ومع ذلك بقى رئيس لمصر … حينما يتهمونك بالعمالة والخيانة ، فلا تكترث بهم ، فقد تصبح رئيسهم يوما ما !!!. 19 / 7 / 2011

من الأمور اللى مقويانى جوا السجن ، إن السجن ده اتسجن فيه عظماء كتير قبلى . منهم على سبيل المثال ، محمد نجيب رئيس الجمهورية السابق واللى اتعرض للتعذيب هنا . برضه د . أسامة الغزالى حرب رئيس آخر حزب إنتميت ليه قبل سجنى . برضه الدكتور وصفى رياض خال والدتى اللى كان من بين النشطاء اللى اعتقلهم السادات فى سبتمبر 1981 .

لى الشرف أن أكون سجين رأى فى هذا المكان . 19 / 7 / 2011

امبارح بس عرفت إن عبدالحكيم عامر هو اللى كتب قانون ” الأحكام العسكرية ” اللى بينظم القضاء العسكرى … مش عارف أقول ايه ، يعنى مش كفاية ضيع سينا ، كمان يحط قانون فاشى يسيطر بيه على الشعب المصرى فى اطار صراعه مع عبدالناصر على السلطة … احا. 20 / 7 / 2011